|
New Page 1
Wenk van die week2: Terug
Een van die statistieke is dat bykans een uit elke drie balle wat na
die kantlyn geskop word nie uit is nie. Dit sluit balle uit wat in oop spasies
of net bloot veldaf geskop word. Naas Botha het so 2 maande gelede aanbeveel dat
skoppe wat nie uit is nie as omgekeerde besit getel word. Nou hoekom is dit dat
spelers nie soos Spencer van New Zealand die bal kan uitskop nie.
- Die eerste is oefening: Kry 'n "hoela hoop" (die ronde plastiek
sirkels wat so 'n meter in deursnit is) en plaas dit op die kwartlyn. Gaan
staan nou op die doellyn en kyk of jy die bal kan skop dat hy in die sirkel
hop. As jy gereeld die bal naby of in die sirkel kan plaas, skuif die sirkel
so 5 meter verder en herhaal die oefening totdat jy jou gemaklike
skopafstand bereik. Plaas nou die sirkel 1 meter buite die kantlyn regoor
jou gemaklike afstand, gaan staan so 10 meter van die hoekvlag op die
doellyn en probeer weer. Jy sal vind jy skop nie so goed nie, want die
kantlyn sit jou af. Hou aan oefen tot jy tevrede is dat jy die bal elke
keer uitskop. Vat nou die sirkel weg en skop na 'n denkbeeldige sirkel.
Bêre die denkbeeldige sirkel in jou kop en as jy gedurende 'n wedstryd die
bal moet uitskop, verbeel jou die sirkel lê so 'n meter buite die veld op
jou gemaklike afstand. Vra so nou en dan 'n brawe vriend om die skoppe te
kom afstorm as jy oefen sodat jy die skop onder druk ook kan doen.
- Tegniek: Om maksimum afstand in 'n golfhou te kry moet jy mooi
deurswaai. In rugby moet jy jou been soos 'n golfstok gebruik om 'n bal so ver moontlik te skop.
Golfstokke is reguit, so jy moet jou been ook reguit hou. Probeer deur die
bal skop en nie na die bal.
- Tydsberekenig: Dawie Snyman het altyd sy agterspelers dwars oor die veld
laat hardloop met 'n bal wat hulle so net onder borshoogte met reguit arms
voor hulle moes hou en op hul bobene net agter die knie hop en vang, elke
keer as die bene opkom. Dit is 'n baie goeie oefening om jou 'n gevoel te
gee van hoe die bal na jou voet sal beweeg voor jy skop. Die grootste
probleem by skoppe is dat die been te vroeg deurswaai en dat jy die bal tref
as hy nog te ver van die grond is. Let volgende keer op as iemand 'n
woer-woer skop los hoe hoog die bal van die grond is. As jy nie die gewoonte
kan afleer om jou been te gou te swaai nie, laat die bal dan jou hande
vinniger afwaarts verlaat.
|
